នារសៀលថ្ងៃទី១២ ខែវិច្ឆិកា ឆ្នាំ២០២៥ ឯកឧត្តមបណ្ឌិត ធន់ វឌ្ឍនា អនុប្រធានទី២ ព្រឹទ្ធសភា និងជាប្រធានគណៈកម្មការពិសេស បានដឹកនាំកិច្ចប្រជុំគណៈកម្មការពិសេស ដើម្បីពិនិត្យ និងកែសម្រួលសេចក្តីស្នើច្បាប់វិសោធនកម្មច្បាប់ស្តីពីការបោះឆ្នោតជ្រើសតាំងសមាជិកព្រឹទ្ធសភា ឱ្យស្របតាមស្មារតីអង្គប្រជុំគណៈកម្មាធិការអចិន្រ្តៃយ៍ មុនបញ្ជូនទៅរដ្ឋសភា តាមនីតិវិធីបន្ត។

គណៈកម្មការពិសេស មានជំនឿមុតមាំថា វិសោធនកម្មច្បាប់នេះ នឹងជួយឱ្យសមាជិកព្រឹទ្ធសភា បំពេញតួនាទីកាន់តែមានប្រសិទ្ធភាព និងមានគណនេយ្យភាពខ្ពស់ជាមួយអង្គបោះឆ្នោត និងពលរដ្ឋនៅតាមមូលដ្ឋាន។

ស្ថិតក្នុងបរិបទដែលថៃ បានប្រកាសលុបចោលជាឯកតោភាគីនូវ កិច្ចព្រមព្រៀងសន្តិភាពកម្ពុជា-ថៃ ដែលទើបបានចុះហត្ថលេខា នៅថ្ងៃទី២៦ ខែតុលា នៅម៉ាឡេស៊ី ឯកឧត្តមបណ្ឌិត ស្នើសមាជិកព្រឹទ្ធសភាទាំងអស់ ជាពិសេសសមាជិក ដែលនៅភូមិភាគជាប់ព្រំដែន ត្រូវរក្សាភាពស្ងប់ស្ងាត់ ប៉ុន្តែត្រៀមសម្រាប់ហេតុការណ៍ជាយថាហេតុ និងត្រូវបន្តពង្រឹងស្មារតីគាំទ្រផលិតផលខ្មែរ និងជំរុញសមត្ថភាពផលិត ឈានទៅជំនួសផលិតផលនាំចូលឱ្យបានកាន់តែច្រើន។

ខ្លឹមសារ៖ ខុទ្ទកាល័យឯកឧត្តមអនុប្រធានទី២ព្រឹទ្ធសភា
រូបភាព៖ នាយកដ្ឋានព័ត៌មាន